بسم الله الرحمن الرحيم

ليك في الكورة ...؟
بتشجع نادي ...
بتروحلة الاستاد تشجعه ...؟
طيب بتشوفله مبارياته في التليفزيون ....؟
يوووه
طب ليك في النظام ....؟
النظام بتاع التنظيم يعين مش النظام بتاع بابا حسني خلى بالك ما تودنيش في داهيه

المهم انا بتكلم على المباريات والجماهير والنادي الاهلي ونادي الزمالك والمصري البورسعيدي
وكل اللى بيلعب كورة في مصر وعنده جماهير ..

كالمعتاد كل صيف بيبدأ الدوري وينتهي في اخر الشتا ...
الاندية بتلعب يا اما عشان المرز التاني وتشترك في بطولة افريقيا للاندية الابطال
او المركز التالت عشان بطولة افريقيا الكونفيدراليه
هتقولي طب والمركز الاول هقولك لا ده بتاع الاهلى
لانه نادي محترم واللى ماسكينه خايفين عليه وبيحبوه وبيعملوا لمصلحته مش لمصلحتهم
يعني مفركوش مرة يبيعوا الفرع القديم اللى في الجزيرة او يخصخصوة عشان هما يعني يا حرام فاشلين فيه
او هيجبلهم فلوس كتيرة زي ما اللطخ اسف الاخ نظيف ما بيعمل سوري عمل ...
دي مش قصتنا
القصة الاساسيه في انك لما تشوف مباراة للنادي الاهلى بتلاقي المشججعين بتوعه عاملين شغل في المدرجات
وشغل هنا مش بهلونات وزمامير والوان ودنيا فاضية
الشغل عندي ومن وجهة نظري انهم على الاقل مش بنسمع

منهم شتايم من اياها اللي بنسمعها في حتت تانيه كتير
ومش بيسبوا دين زي ما جماهير الاسماعيلي بتعمل
طبعا انا مش بقول ان كل جماهير الاهلي كده .... ولا من ساعه ما كان في جماهير العملية كانت على النظام ده
بالعكس الجماهير زمان , وزمان دي يعني من قبل سنه 90 كانوا محترمين وكنت تلاقي العائلات في المدرجات اب وام وابن وبنت ..... رايحين يشوفوا ماتش وواخدين اكل ومفرش ياكلوا ويصلوا ويشجعوا بيقضوا يومهم يعني انما من بعد كده

بطلوا يروحوا لان الجمهور خلاص بقى بيروح عشان يسب

ويشتم ويشاور بصباعه ويعمل اللى مش عارف يعملوا في حتة تانيه ...

جماهير الاهلى او البعض منها كان نفس النظام بشتم ويسب ويخرب الدنيا
كذلك الاسماعيلي وللاسف ما زال هو والزمالك كده
اما جماهير الاهلى الغالبيه منها بطلت
مش كده وبس
دول كمان بيعملوا احتفالات في المدرجات زي اللى كنت بتشوفها في الملاعب الاوروبية
اعلام كبيرة للنادي وبوسترات ونموذج تي شيرت لاعب اعتزل او غايب او مصاب بيكنوا ليه مشاعر الود والاحترام ...
الاهلى يخسر يشجعوه ويسقفولوه
طبعا مش كل جماهير الاهلى كده
لاني في للاسف لسه اللى مش محترم
لكن الغالبية من اللى بيروحوا الاستاد محترمين وبيعملوا ده لدرجة انى بنتظر الكاميرا تروح على الجمهور عاشن استمتع بمنظرهم وهما متحضرين كده
وولاد مع بنات بيشجعوا ولا بيتحرشوا بيهم ولا دياولوا
لو سالنا كل ده ليه
ليه الجماهير دي خدت الطريق الصح اللى كان غايب من كتير
هقولك لان الادارة بتاعت الاهلى بقيمها واحترامها وادبها وذوقها علمت الجماهير تبقى كده
خافت على النادي فالجمهور خاف عليه اكتر
حبت النادي فالجمهور عشق الفريق
بتتعامل بزوق واحترام ولما بيختلفوا ما بنعرفش انهم بيختلفوا
لذلك الجمهور بقى نفس النظام
واكيد الجمهور كان عنده إرادة انه يبقى كده عشان كده لما جت الفرصه استثمرها
والفرصة كانت ان النادي الاهلى بيفوز وبياخد بطولات ولاعيبته منظمة ومحترمة ومتواضعه عند الفوز
ومنهم اللى بيبكي لما النادي بيخسر , ولما تبقى بتشجع وتشوف لاعيبك بيبكي وبيشهلق مش بيلم شنطة ومروح عادي وخلاص اللى حصل حصل
اكيد ده بيخليك تفكر مليون الميه قبل ما تقوم تقول كلمة في حقه او في حق الادارة
وانت واقف في الاستاد بتشجعهم
كل ده كان عامل اساسي في ان يبقى عندنا جمهور محترم
واظن ان الادارة كانت عامل اساسي في كده
اه حاجه كمان
انت عارف لما النادي الاهلى حقق ميزانية كبيرة قوي بالنسبة للاندية العربية وهي 200 مليون جنيه
عارف عمل ايه ؟
تخيل كده ؟
خمن ؟
لا لا معملش تمثال لابو تريكة عشان ودانا اليابان
لا برضه ما جابش رونالدو اللى بقى تخين ومحدش عايز يشتريه
ولا دي برضه
رفع مرتبات كل الموظفين بالنادي الاهلى
وعشان الفت انتباهك
النادي الاهلى ملك للدولة مش مؤسسة خاصه وربنا يستر عليه من الخصخصة
تخيل بقى نادي ادارته بتعمل كل ده
بزمتك يا اخي مش ده هينعكس على سلوك كل اللى بينتمي للنادي
ويخليه فخور قوي وهو بيطلع كارنيه النادي بتاعه
وبيبقى هيموت من الفخر وهو ماسك كارنيه عليه شعار النادي الاهلى
بزمتك عمرك مسكت بطاقتك وكنت فرحان قوي ومفتخر بيها ...

تقدر تقولي بكل امانه وصراحه
لو قارنا بين مجلس ادارة النادي الاهلى وبين النظام الحاكم دلوقتي رئيس وحكومة وحزب ...
والشعب المصري والموظفين المصريين بجماهير النادي الاهلى
هتلاحظ ايه
ودماغك هتروح لفين ... ؟
قبل ما اخلص احب اقول ان مدرب جه النادي الاهلى وقال مثل حلو قوي
اللى هو " السمكة تفسد من راسها " الا في النادي الاهلى ...

فعلا السمكة تفسد من راسها ....